 |
| saaqii naama huaa khema zan kaarvaan-e-bahaar allama iqbal |
saaqii naama huaa khema zan kaarvaan-e-bahaar allama iqbal nazms -Saaqi Nama
Saqi Nama | ساقی نامہ
( بال جبریل علامہ اقبال)
ہوا خیمہ زن کاروان بہار
ارم بن گیا دامن کوہسار
گل و نرگس و سوسن و نسترن
شہید ازل لالہ خونیں کفن
جہاں چھپ گیا پردۂ رنگ میں
لہو کی ہے گردش رگ سنگ میں
فضا نیلی نیلی ہوا میں سرور
ٹھہرتے نہیں آشیاں میں طیور
وہ جوئے کہستاں اچکتی ہوئی
اٹکتی لچکتی سرکتی ہوئی
اچھلتی پھسلتی سنبھلتی ہوئی
بڑے پیچ کھا کر نکلتی ہوئی
رکے جب تو سل چیر دیتی ہے یہ
پہاڑوں کے دل چیر دیتی ہے یہ
ذرا دیکھ اے ساقی لالہ فام
سناتی ہے یہ زندگی کا پیام
پلا دے مجھے وہ مئے پردہ سوز
کہ آتی نہیں فصل گل روز روز
وہ مے جس سے روشن ضمیر حیات
وہ مے جس سے ہے مستی کائنات
وہ مے جس میں ہے سوز و ساز ازل
وہ مے جس سے کھلتا ہے راز ازل
اٹھا ساقیا پردہ اس راز سے
لڑا دے ممولے کو شہباز سے
زمانے کے انداز بدلے گئے
نیا راگ ہے ساز بدلے گئے
ہوا اس طرح فاش راز فرنگ
کہ حیرت میں ہے شیشہ باز فرنگ
پرانی سیاست گری خوار ہے
زمیں میر و سلطاں سے بے زار ہے
گیا دور سرمایہ داری گیا
تماشا دکھا کر مداری گیا
گراں خواب چینی سنبھلنے لگے
ہمالہ کے چشمے ابلنے لگے
دل طور سینا و فاران دو نیم
تجلی کا پھر منتظر ہے کلیم
مسلماں ہے توحید میں گرم جوش
مگر دل ابھی تک ہے زنار پوش
تمدن تصوف شریعت کلام
بتان عجم کے پجاری تمام
حقیقت خرافات میں کھو گئی
یہ امت روایات میں کھو گئی
لبھاتا ہے دل کو کلام خطیب
مگر لذت شوق سے بے نصیب
بیاں اس کا منطق سے سلجھا ہوا
لغت کے بکھیڑوں میں الجھا ہوا
وہ صوفی کہ تھا خدمت حق میں مرد
محبت میں یکتا حمیت میں فرد
عجم کے خیالات میں کھو گیا
یہ سالک مقامات میں کھو گیا
بجھی عشق کی آگ اندھیر ہے
مسلماں نہیں راکھ کا ڈھیر ہے
شراب کہن پھر پلا ساقیا
وہی جام گردش میں لا ساقیا
مجھے عشق کے پر لگا کر اڑا
مری خاک جگنو بنا کر اڑا
خرد کو غلامی سے آزاد کر
جوانوں کو پیروں کا استاد کر
ہری شاخ ملت ترے نم سے ہے
نفس اس بدن میں ترے دم سے ہے
تڑپنے پھڑکنے کی توفیق دے
دل مرتضی سوز صدیق دے
جگر سے وہی تیر پھر پار کر
تمنا کو سینوں میں بیدار کر
ترے آسمانوں کے تاروں کی خیر
زمینوں کے شب زندہ داروں کی خیر
جوانوں کو سوز جگر بخش دے
مرا عشق میری نظر بخش دے
مری ناؤ گرداب سے پار کر
یہ ثابت ہے تو اس کو سیار کر
بتا مجھ کو اسرار مرگ و حیات
کہ تیری نگاہوں میں ہے کائنات
مرے دیدۂ تر کی بے خوابیاں
مرے دل کی پوشیدہ بیتابیاں
مرے نالۂ نیم شب کا نیاز
مری خلوت و انجمن کا گداز
امنگیں مری آرزوئیں مری
امیدیں مری جستجوئیں مری
مری فطرت آئینۂ روزگار
غزالان افکار کا مرغزار
مرا دل مری رزم گاہ حیات
گمانوں کے لشکر یقیں کا ثبات
یہی کچھ ہے ساقی متاع فقیر
اسی سے فقیری میں ہوں میں امیر
مرے قافلے میں لٹا دے اسے
لٹا دے ٹھکانے لگا دے اسے
دما دم رواں ہے یم زندگی
ہر اک شے سے پیدا رم زندگی
اسی سے ہوئی ہے بدن کی نمود
کہ شعلے میں پوشیدہ ہے موج دود
گراں گرچہ ہے صحبت آب و گل
خوش آئی اسے محنت آب و گل
یہ ثابت بھی ہے اور سیار بھی
عناصر کے پھندوں سے بے زار بھی
یہ وحدت ہے کثرت میں ہر دم اسیر
مگر ہر کہیں بے چگوں بے نظیر
یہ عالم یہ بت خانۂ شش جہات
اسی نے تراشا ہے یہ سومنات
پسند اس کو تکرار کی خو نہیں
کہ تو میں نہیں اور میں تو نہیں
من و تو سے ہے انجمن آفریں
مگر عین محفل میں خلوت نشیں
چمک اس کی بجلی میں تارے میں ہے
یہ چاندی میں سونے میں پارے میں ہے
اسی کے بیاباں اسی کے ببول
اسی کے ہیں کانٹے اسی کے ہیں پھول
کہیں اس کی طاقت سے کہسار چور
کہیں اس کے پھندے میں جبریل و حور
کہیں جزہ ہے شاہین سیماب رنگ
لہو سے چکوروں کے آلودہ چنگ
کبوتر کہیں آشیانے سے دور
پھڑکتا ہوا جال میں ناصبور
فریب نظر ہے سکون و ثبات
تڑپتا ہے ہر ذرۂ کائنات
ٹھہرتا نہیں کاروان وجود
کہ ہر لحظ ہے تازہ شان وجود
سمجھتا ہے تو راز ہے زندگی
فقط ذوق پرواز ہے زندگی
بہت اس نے دیکھے ہیں پست و بلند
سفر اس کو منزل سے بڑھ کر پسند
سفر زندگی کے لیے برگ و ساز
سفر ہے حقیقت حضر ہے مجاز
الجھ کر سلجھنے میں لذت اسے
تڑپنے پھڑکنے میں راحت اسے
ہوا جب اسے سامنا موت کا
کٹھن تھا بڑا تھامنا موت کا
اتر کر جہان مکافات میں
رہی زندگی موت کی گھات میں
مذاق دوئی سے بنی زوج زوج
اٹھی دشت و کوہسار سے فوج فوج
گل اس شاخ سے ٹوٹتے بھی رہے
اسی شاخ سے پھوٹتے بھی رہے
سمجھتے ہیں ناداں اسے بے ثبات
ابھرتا ہے مٹ مٹ کے نقش حیات
بڑی تیز جولاں بڑی زود رس
ازل سے ابد تک رم یک نفس
زمانہ کہ زنجیر ایام ہے
دموں کے الٹ پھیر کا نام ہے
یہ موج نفس کیا ہے تلوار ہے
خودی کیا ہے تلوار کی دھار ہے
خودی کیا ہے راز درون حیات
خودی کیا ہے بیداری کائنات
خودی جلوہ بدمست و خلوت پسند
سمندر ہے اک بوند پانی میں بند
اندھیرے اجالے میں ہے تابناک
من و تو میں پیدا من و تو سے پاک
ازل اس کے پیچھے ابد سامنے
نہ حد اس کے پیچھے نہ حد سامنے
زمانے کے دریا میں بہتی ہوئی
ستم اس کی موجوں کے سہتی ہوئی
تجسس کی راہیں بدلتی ہوئی
دما دم نگاہیں بدلتی ہوئی
سبک اس کے ہاتھوں میں سنگ گراں
پہاڑ اس کی ضربوں سے ریگ رواں
سفر اس کا انجام و آغاز ہے
یہی اس کی تقویم کا راز ہے
کرن چاند میں ہے شرر سنگ میں
یہ بے رنگ ہے ڈوب کر رنگ میں
اسے واسطہ کیا کم و بیش سے
نشیب و فراز و پس و پیش سے
ازل سے ہے یہ کشمکش میں اسیر
ہوئی خاک آدم میں صورت پذیر
خودی کا نشیمن ترے دل میں ہے
فلک جس طرح آنکھ کے تل میں ہے
خودی کے نگہباں کو ہے زہر ناب
وہ ناں جس سے جاتی رہے اس کی آب
وہی ناں ہے اس کے لیے ارجمند
رہے جس سے دنیا میں گردن بلند
خودی فال محمود سے درگزر
خودی پر نگہ رکھ ایازی نہ کر
وہی سجدہ ہے لائق اہتمام
کہ ہو جس سے ہر سجدہ تجھ پر حرام
یہ عالم یہ ہنگامۂ رنگ و صوت
یہ عالم کہ ہے زیر فرمان موت
یہ عالم یہ بتخانۂ چشم و گوش
جہاں زندگی ہے فقط خورد و نوش
خودی کی یہ ہے منزل اولیں
مسافر یہ تیرا نشیمن نہیں
تری آگ اس خاک داں سے نہیں
جہاں تجھ سے ہے تو جہاں سے نہیں
بڑھے جا یہ کوہ گراں توڑ کر
طلسم زمان و مکاں توڑ کر
خودی شیر مولا جہاں اس کا صید
زمیں اس کی صید آسماں اس کا صید
جہاں اور بھی ہیں ابھی بے نمود
کہ خالی نہیں ہے ضمیر وجود
ہر اک منتظر تیری یلغار کا
تری شوخئی فکر و کردار کا
یہ ہے مقصد گردش روزگار
کہ تیری خودی تجھ پہ ہو آشکار
تو ہے فاتح عالم خوب و زشت
تجھے کیا بتاؤں تری سر نوشت
حقیقت پہ ہے جامۂ حرف تنگ
حقیقت ہے آئینہ گفتار زنگ
فروزاں ہے سینے میں شمع نفس
مگر تاب گفتار رکھتی ہے بس
اگر یک سر موئے برتر پرم
فروغ تجلی بسوزد پرم
Hua khema-zan karwan-e-bahaar
Iram ban gaya daman-e-koh-sar
Gul o nargis o sosan o nastaran
shahid-e-azal lala-KHunin kafan
Jahan chhup gaya parda-e-rang mein
lahu ki hai gardish rag-e-sang mein
Faza nili nili hawa mein surur
Thaharte nahin aashiyan mein tuyur
Wo ju-e-kohistan uchakti hui
Atakti lachakti sarakti hui
uchhalti phisalti sambhalti hui
bare pech kha kar nikalti hui
ruke jab to sil chir deti hai ye
pahaDon ke dil chir deti hai ye
zara dekh ai saqi-e-lala-fam
sunati hai ye zindagi ka payam
pila de mujhe wo mai-e-parda-soz
ki aati nahin fasl-e-gul roz roz
wo mai jis se raushan zamir-e-hayat
wo mai jis se hai masti-e-kaenat
wo mai jis mein hai soz-o-saz-e-azal
wo mai jis se khulta hai raaz-e-azal
Utha saqiya parda is raaz se
Lara de mamule ko shahbaz se
zamane ke andaz badle gae
naya rag hai saz badle gae
hua is tarah fash raaz-e-farang
ki hairat mein hai shisha-baz-e-farang
purani siyasat-gari khwar hai
zamin mir o sultan se be-zar hai
gaya daur-e-sarmaya-dar gaya
tamasha dikha kar madari gaya
giran khwab chini sambhalne lage
himala ke chashme ubalne lage
dil-e-tur-e-sina-o-faran do-nim
tajalli ka phir muntazir hai kalim
musalman hai tauhid mein garam-josh
magar dil abhi tak hai zunnar-posh
tamaddun tasawwuf shariat-e-kalam
butan-e-ajam ke pujari tamam
haqiqat Khurafat mein kho gai
ye ummat riwayat mein kho gai
lubhata hai dil ko kalam-e-Khatib
magar lazzat-e-shauq se be-nasib
bayan is ka mantiq se suljha hua
lughat ke bakheron mein uljha hua
wo sufi ki tha Khidmat-e-haq mein mard
mohabbat mein yakta hamiyat mein fard
ajam ke KHayalat mein kho gaya
ye salik maqamat mein kho gaya
bujhi ishq ki aag andher hai
musalman nahin rakh ka Dher hai
sharab-e-kuhan phir pila saqiya
wahi jam gardish mein la saqiya
mujhe ishq ke par laga kar ura
meri Khak jugnu bana kar ura
Khirad ko ghulami se aazad kar
jawanon ko piron ka ustad kar
hari shakh-e-millat tere nam se hai
nafas is badan mein tere dam se hai
tarapne pharakne ki taufiq de
dil-e-murtaza soz-e-siddiq de
jigar se wahi tir phir par kar
tamanna ko sinon mein bedar kar
tere aasmanon ke taron ki KHair
zaminon ke shab zinda-daron ki KHair
jawanon ko soz-e-jigar bakhsh de
mera ishq meri nazar baKHsh de
meri naw girdab se par kar
ye sabit hai to is ko sayyar kar
bta mujh ko asrar-e-marg-o-hayat
ki teri nigahon mein hai kaenat
Mere dida-e-tar ki be-KHwabiyan
mere dil ki poshida betabiyan
Mere nala-e-nim-shab ka niyaz
meri khalwat o anjuman ka gudaz
Umangen meri aarzuen meri
Ummeden meri justujuen meri
meri fitrat aaina-e-rozgar
ghazalan-e-afkar ka murgh-zar
mera dil meri razm-gah-e-hayat
gumanon ke lashkar yaqin ka sabaat
yahi kuchh hai saqi mata-e-faqir
isi se faqiri mein hun main amir
mere qafile mein luTa de ise
luTa de Thikane laga de ise
dama-dam rawan hai yam-e-zindagi
har ek shai se paida ram-e-zindagi
isi se hui hai badan ki numud
ki shole mein poshida hai mauj-e-dud
giran garche hai sohbat-e-ab-o-gil
Khush aai ise mehnat-e-ab-o-gil
ye sabit bhi hai aur sayyar bhi
anasir ke phandon se be-zar bhi
ye wahdat hai kasrat mein har dam asir
magar har kahin be-chugon be-nazir
ye aalam ye but-khana-e-shash-jihat
isi ne tarasha hai ye somnat
pasand is ko takrar ki KHu nahin
ki tu main nahin aur main tu nahin
man o tu se hai anjuman-afrin
magar ain-e-mahfil mein KHalwat-nashin
chamak us ki bijli mein tare mein hai
ye chandi mein sone mein pare mein hai
usi ke bayaban usi ke babul
usi ke hain kante usi ke hain phool
kahin us ki taqat se kohsar chur
kahin us ke phande mein jibrail o hur
kahin jaza hai shahin simab rang
lahu se chakoron ke aaluda chang
kabutar kahin aashiyane se dur
phaDakta hua jal mein na-subur
fareb-e-nazar hai sukun o sabaat
tarapta hai har zarra-e-kainat
Thaharta nahin karwan-e-wajud
ki har lahz hai taza shan-e-wajud
samajhta hai tu raaz hai zindagi
faqat zuaq-e-parwaz hai zindagi
bahut us ne dekhe hain past o buland
safar us ko manzil se barh kar pasand
safar zindagi ke liye barg o saz
safar hai haqiqat hazar hai majaz
ulajh kar sulajhne mein lazzat use
tarapne pharakne mein rahat use
hua jab use samna maut ka
kathin tha bara thamna maut ka
utar kar jahan-e-makafat mein
rahi zindagi maut ki ghat mein
mazaq-e-dui se bani zauj zauj
uthi dasht o kohsar se fauj fauj
gul is shakh se TuTte bhi rahe
isi shaKH se phuTte bhi rahe
samajhte hain nadan use be-sabaat
ubharta hai miT miT ke naqsh-e-hayat
bari tez jaulan bari zud-ras
azal se abad tak ram-e-yak-nafs
zamana ki zanjir-e-ayyam hai
damon ke ulat-pher ka nam hai
ye mauj-e-nafs kya hai talwar hai
Khudi kya hai talwar ki dhaar hai
Khudi kya hai raaz-darun-hayat
Khudi kya hai bedari-e-kaenat
Khudi jalwa badmast o Khalwat-pasand
samundar hai ek bund pani mein band
andhere ujale mein hai tabnak
man o tu mein paida man o tu se pak
azal us ke pichhe abad samne
na had us ke pichhe na had samne
zamane ke dariya mein bahti hui
sitam us ki maujon ke sahti hui
tajassus ki rahen badalti hui
dama-dam nigahen badalti hui
subuk us ke hathon mein sang-e-giran
pahar us ki zarbon se reg-e-rawan
safar us ka anjam o aaghaz hai
yahi us ki taqwim ka raaz hai
kiran chand mein hai sharar sang mein
ye be-rang hai Dub kar rang mein
ise wasta kya kam-o-besh se
nasheb o faraaz o pas-o-pesh se
azal se hai ye kashmakash mein asir
hui KHak-e-adam mein surat-pazir
Khudi ka nasheman tere dil mein hai
falak jis tarah aankh ke til mein hai
Khudi ke nigah-ban ko hai zahr-nab
wo nan jis se jati rahe us ki aab
wahi nan hai us ke liye arjumand
rahe jis se duniya mein gardan buland
Khudi fal-e-mahmud se darguzar
Khudi par nigah rakh ayazi na kar
wahi sajda hai laiq-e-ehtimam
ki ho jis se har sajda tujh par haram
ye aalam ye hangama-e-rang-o-saut
ye aalam ki hai zer-e-farman-e-maut
ye aalam ye but-Khana-e-chashm-o-gosh
jahan zindagi hai faqat KHurd o nosh
KHudi ki ye hai manzil-e-awwalin
musafir ye tera nasheman nahin
teri aag is Khak-dan se nahin
jahan tujh se hai tu jahan se nahin
barhe ja ye koh-e-giran tor kar
tilism-e-zaman-o-makan tor kar
Khudi sher-e-maula jahan us ka said
zamin us ki said aasman us ka said
jahan aur bhi hain abhi be-numud
ki Khali nahin hai zamir-e-wajud
har ek muntazir teri yalghaar ka
teri shaukhi-e-fikr-o-kirdar ka
ye hai maqsad gardish-e-rozgar
ki teri Khudi tujh pe ho aashkar
tu hai fatah-e-alam-e-Khub-o-zisht
tujhe kya bataun teri sarnawisht
haqiqat pe hai jama-e-harf-e-tang
haqiqat hai aaina-e-guftar-e-zang
farozan hai sine mein sham-e-nafas
magar tab-e-guftar rakhti hai bas
agar yak-sar-e-mu-e-bartar param
farogh-e-tajalli ba-sozad param
Poet: Allama Muhammad Iqbal
